Adventskalendergåver

Jada, eg jobbar fortsatt med å få ut alt frå 2013.

Kvar gong eg ser gjennom albumet og prøver å samle i hop det eg kan legge ut i lag ser eg at "Oi, der var noko og, det hadde eg jo gløymd". Så det blir litt kollasje framover så eg får dei ut og kan starte på 2014. :)

Barndomsveninna mi, Jorunn, og eg har dei siste to åra laga adventskalendarar til kvarandre. Det er veldig koseleg. I 2013 laga eg store delar av gåvene til henne.

Adventslysa oppe til venstre er IKEA lys. Eg har kopiert tekst over på silkepapir og brukt varmluftspistol til å få det på lysa. 

Ho fekk ei lilla lyslykt og ei raud, men det er to bilete av kvar med og utan lys i.

Det gjekk med 20 gram mandarin petit til den raude og 20 gram Marks & Kattens Bianca (HUV garn) til den lilla lyslykta. Eg hekla ei heilt lik lilla lyslykt til meg sjølv og.

Dei raude glasbrikkene er hekla i Mandarin petit og kanten er London gull. Her bør eg eigentleg springe på loftet å hente fram nøsta for å finne ut nøyaktig kva eg brukte av kvar, men, ja, dei veg 42 gram til saman. :)

Dei kvite make-up remover padsa er hekla i Mandarin petit og det gjekk med 25 gram.

Tøflane og gryteunderlaga er strikka og hekla i Eskimo og tova i vaskemaskin. Det gjekk med 171 gram til tøflane og 81 gram til gryteunderlaga.

Ja, då nærmar eg meg, litt etter litt. :)

Eg strikker i veg på HUV- garn

Mykje av garnet eg fekk i min HUV pakke har blitt strikka opp, eg må berre få tatt litt bilete først. Du kan lese om HUV her.

Det store, grønne nøstet du ser oppe til venstre var eg svært usikker på kva eg skulle bruke til, men så slo det meg at det hadde jo i grunn ei perfekt puteform. Eg måtte spør "sjefen" for HUV om eg fekk lov til å gjere det slik og då klarsignalet kom var det berre å finne eit mønster å sette i gong. Eg tok utgangspunkt i dette mønsteret, men endra det noko for å få det til å passe, og så laga eg det meir som ei  passande pute i sofaen vår. :) Banderolen på Big Ball Soft garnet er sjølvsagt ikkje inne i puta. :) I midten på det store nøstet putta eg det som var att av garnet eg strikka sjølve putetrekket med. Puta vart sydd i hop med maskesting og passar no fint på toppen av sofaen i sofakroken. Då fekk eg brukt opp 200 gram med Big Ball Soft og 100 gram med Gedifra Fashion Trend Color.

Meir info her (ravelry).

Fire nøster med Løve Garn Cocoon endte opp som eit litt hardt sitteunderlag. Då er det berre til å strikke vidare på HUV-garn. :) Eg har alt strikka opp ein del av bomullsgarnet. Solberg Glans Mohair og Rowan Denim er tomt og no er det nokre få gram att så er eg ferdig med Rowan Tapestry og. Det var berre dei bileta då....

Meir info her (ravelry).

Vinkartongtrekk

 Ei veninne spurde for ei tid tilbake om eg kunne strikke eit vinkartongtrekk for henne som dei kan ha i båten når dei skal på ferie. Ho kjøpte inn garn og garnet vart no liggande her ei stund før eg kom i gong. No er det ei stund sidan det var ferdig, 21.mai, men på søndag vart det levert.

 Mønsteret er henta frå Marius strikkeboka.

Det gjekk med 83 gram med garn totalt.

Pinnenr 5 mm og Sandnes Garn Smart.

Så får eg håpe at trekket pynter opp i båten,

og at dei får ein flott ferie langs norskekysten. :)

Nye lyslykter

Nok eit sett med lyslykter.

Desse vart hekla for lenge sidan, men trådfesting

og pynt har tatt si tid.

På fredag kom veninna mi, som skulle få desse,

på besøk, så då var det berre å hive seg rundt

og gjere dei ferdig så eg fekk levert dei.

Og så vert det med desse som med

tennbrikettboksskjularane,

eg har enno ikkje hekla til meg sjølv...

Eg har brukt 37 gram Mandarin petit

og clover heklenål 3mm.

Eg innser at alle dei gamle heklenålene mine

skal byttast ut med clover.

Så mykje betre å halde i og så mykje betre for fingrar

og hender å hekle med.

Umaro og vinnar av konkurranse

Umaroteppet vårt er endeleg ferdig!!

Eg starta på det ein gong i juni, strikka litt på det og la det vekk,

fortsatte litt i august så eg kom halvvegs og så vart det ein ufo.

2.juledag starta eg opp att og nyttårsaftan var det ferdig.

Festa trådar og vaska det 1.nyttårsdag,

men då eg skulle blokke det innsåg eg at me har for liten plass...

Så foreløpig ser det litt skjeivt og skakt ut til eg får pønska ut ein plass

eller måte å blokke det på.

Det kan vere eg berre på legge det dobbelt.

Umaro

Pinnenr: 7mm

Garn: Enkeltråd Drops Nepal

Mengde: 1112 gram

Ublokka måler det 102x175cm,

men då eg starta å blokke det vart det over 2m,

og då eg hadde strikka det målte det 1,90,

så eg vil tru eg skal få det opp mot/over 2m ved blokking

så mannen i heimen vert nøgd. ;)

Og så over til noko eg skulle ha ordna for lenge sidan. *Flaut*

Vinnar av konkurransen min!!

På grunn av min treighet så vert det to vinnarar,

ein tilfeldig, men og ein premie til den som har føreslått det

namnet som eg har valgt.

Namnet eg har valgt til desse er:

Guardian Angels

som Lykketrollet føreslo!!

Tilfeldig vinnar er

Spøt-oline

(Eg fann ingen heimeside/blogg til Spøt-oline)

Send meg adressene dykkar så kjem det ei overrasking i posten.

Mønsteret får eg sjå kor kjapt eg klarer å somle meg til å legge ut...

Hehe...

Lyslykter og jul

Så var det jul!

Eg har fått hekla 11 lyslykter i gåver,

to av dei forsvann litt fort ut av huset i dag,

så dei manglar det bilete av.

Alle desse er hekla i Mandarin Petit og

det har til saman gått med 200 gram garn.

Dei er hekla på clover heklenål 3,5mm.

Eg er veldig fornøyd med den nye heklenåla mi. ;)

Eg vil med dette få ønskje alle som er innom ei

riktig GOD JUL!!

Her vart det faktisk kvit jul i år, snøen kom i dag og ligg

kvit og fin ute.

Englar og konkurranse

Eg er svært glad i englar og har lenge ønska å lage ein

tennbrikettboksskjular med englar på.

Det første mønsteret eg laga (det til høgre) synes eg englane

vart litt store på. På det andre (det til venstre)

minska eg englane og laga med annakvar

hjarte og annakvar engel.

I utgangspunktet ønskjer eg forslag til namn på

den til venstre, men dersom det er interesse for

mønsteret til høgre og ønskjer eg og namneforslag

på den til høgre. Tenkjer då ein liten namnekonkurranse

med trekning den 31.desember der vinnaren får eit utvalgt

hespe med garn i posten (kjem tilbake til dette).
Meir info på ravelry.

Fleire tennbrikettboksskjularar

Desse er det og ei god stund sidan eg strikka.

Vert nok nokre julegåver desse og.

Veldig flott og enkelt mønster laga av Tone M.

Fargen kjem best fram på det øvste biletet.

Pinnenr: 6mm

Garn: Drops Alaska

Mengde: 170 gram til saman

Hjertelig tenning #2 og 3

Desse vart og strikka for ei god stund sidan,

men blogglysta har og er vel i grunn ganske laber.

Prøver å få tatt bilete av ting innimellom slik at det kjem

ut litt etter litt før alt etterkvart skal pakkast inn som julegåver.

Dette mønsteret er og eit mønster designa av

Bitta Mikkelborg.

Begge desse er strikka til gåver.

Pinnenr: 4mm

Garn: Drops Lima

Mengde: 76 gram på kvar.

Gnomestrikk

Eg leita på Ravelry eller mønster på nissar då desse dukka opp.

Eg følte på meg at eg hadde sett dei før og at eg kanskje hadde

mønster på dei allereie. Kikka i stashet mitt på ravelry og oppdaga

at, joda, her var det både grått og kvitt nisseskjegg og raudt nissegarn.

Samstundes spurde Månestråle om nokon ville bytte vekk

Sirdar Foxy gar (nisseskjegg). 

Eg er ikkje glad i å strikke ting der ein må stappe bein, kropp

og armar full i vatt, så eg sa gladeleg ja til å bli kvitt dei nøsta

mot at eg fekk strikka eit skjegg til den eine gnomen eg hadde planar om å strikke.

Så då strikka eg denne og sendte både nisseskjegg garn og

raudt nissegarn avgårde til Månestråle.

Og i retur er eg så heldig at eg skal få litt WM Lace Fliederbusch,

så eg vert ferdig med ein jakke som har vore ufo sidan

april då eg innsåg at eg ikkje kom til å få nok garn.

Mønster

Pinnenr: 3mm

Garn: Sirdar Foxy, Marks and Kattens Nissegarn,

Sandnes Mini Alpakka og pt2

Mengde: 47 gram.

Det var eit lite øyeblikk då nissen var ferdig at eg kjente,

"Oi, eg har lyst til å strikke fleire".

Eg måtte knipe meg sjølv i armen og seie til meg sjølv

at det ikkje er aktuelt i det heile for sånn strikking som

det her er eg ikkje noko glad i i det heile. ;)

Ny pyntepute

No er pynt i heimen endra og eg er klar for hausten.

I den anledning trong eg ei ny pyntepute i sofaen.

Denne vart ferdig i dag.

Eg las heile mønsteret litt seint, for i utgangspunktet ville

eg ha knappane på baksida, men, men...

det får bli på neste pute.

Knappane kjøpte eg hos Jannicke´s hjemmekos.

Mønsteret på puta er frå Drops.

Garnet er Drops Alaska

og pinnenr 6mm.
I dag er første dagen på lenge
at det faktisk er opplett heile dagen.
Det surkla godt under beina då eg tusla over
plenen for å plukke plommer i dag,
men det var godt med ein solskinsdag.

No skal eg mekke litt mat til det skal vere

Enjo party/demo her i heimen i kveld.

Ha ein flott fredagskveld alle saman!

New Holland møter Marius og Moods

For ei tid tilbake vart eg tipsa på Facebook om å strikke ei slik pute.

Det tok litt tid før eg kom i gong med den, då eg har ein mann som veit veldig godt kva fargar det skal vere. Og det er ikkje kva som helst fargar som passar i lag med New Holland blå må vite...
 Eg viste mannen fleire forskjellige garn,

men fargane var feile uansett kva eg kom med.

Så til trass for at han meiner eg har litt for mykje garn på loftet,

så måtte me sette oss ned i lag ein kveld og bestille dei riktige fargane.
Link til mønster finn du her.

Traktorane er strikka vha Intarsia.

Innerputa er litt i største laget, så eg må justere litt.

Knappane er bestilt på ebay.

Her er puta plassert i sofaen på kontoret i nyefjøsen.

Den er strikka i Karisma og det gjekk med vel 280 gram.

Nytt til badet?

Først av alt må eg seie tusen takk

for alle dei koselege kommentarane på

Spiderman jakken.

Det var liksom heilt naturleg å hive seg rundt

å strikke den, så alle dei flotte kommentarane frå dykk

overraske og varma.

Tusen takk!

Og takk til alle nye følgarar,-

så koseleg og takk!

Eg var innom Frøken Lykkelig

og såg ein slik flott kurv.

Ettersom eg held på med tanken om å endre litt på badet,

kom jo denne inn som eit alternativ.

Mine er hekla i til saman 75gram Pt Pandora

og 18 gram Gjestal Baby Bomull.

Mønsteret er frå Sandnes sitt Interiør og Hobby,

tema 27.

Heklenål #3mm.

Den minste kjem eg til å bruke på badet til litt dill,

den største veit eg ikkje heilt enno.

Den minste er hekla etter mønsteret i heftet,

medan den største vart til først då

eg trudde mønsteret var litt lite.

Hekla difor nokre ekstra runder i botn

før eg hekla oppover.

Men då den minste var hekla,

skjønte eg fort at det er den eg kjem

til å bruke på badet. ;)

Ønskjer alle ei fin helg.

Her på Vestlandet regnar det.

Tennbrikettboksskjular

I år rakk eg faktisk i siste liten å strikke to tennbrikettvesker. Den første her er Hjertelig tenning, som er nok eit mønster frå Bitta Mikkelborg. Her har eg brukt 100 gram Lima og pinne# 4mm. Kjem nok til å strikke fleire av desse. Kjekke julegåver å gje vekk med ein tennbrikettboks inni.
Viss du har sett mønsteret før og ser nøye etter så ser du at eg har strikka flettene motsatt. Jaja, får strikke rett etter mønsteret på neste. ;) Strikka dette 23.desember og vart gitt vekk på julaftan.
For ei god stund sidan fekk eg og eit mønster, vedbrikettbokshylster, av ToneM på Hobbyboden. Dette har eg og strikka i julegåve, og vart starta på på kvelden på vesle julaftan, fullført tidleg morgon på julaftan, pakka inn og hengt på postkassen til naboen i tide før dei henta posten. ;) Denne er strikka i 100 gram Alaska på pinne# 6mm.
For ei tid sidan hadde ein svoger bursdag. Eg fekk ei lang ønskeliste tilsendt på mobil, som bl.a. inneholdt ulike typar bor, lyspærer, batteri osv.... Eg tenkte: "denne lista leverer eg til mannen, ja", men så kom eg på slutten av sms´en og der stod det jammen meg, strikka sokkar, hals og fingerlause vantar. Og slike ønsker er jo kjekke for ein strikkoholikar, eller kva?

Så sokkar og hals vart strikka. Sokkane er strikka i Viking Sportsragg på pinnenr 3,5mm og det gjekk med 147 gram. Halsen er strikka av 133 gram Smart på pinnenr 4 mm.

Tennbrikettveske

I dag opnar Iris denne i kalendaren sin frå meg. Ho fortalte meg i ønskelista si at ho likar ugler,- som du og ser i dei to innlegga under. Så no håpar eg ikkje at eg har tatt heilt av når det gjeld ugler... :) Hihi... Men når eg oppdagar mønster på mønster med ugler så må eg jo berre strikke. Ho fortalte meg og at ho har ei stor stove der delar av den skal vere ganske fargesprakande med bl.a. oransje. Derfor fekk ho tidleg i kalendaren to oransje nøster og ulike oppskrifter på puter som ho kan strikke sjølv.

Denne tennbrikettveska kjøpte eg mønster på hos Mikk-L design. Den er strikka i Tove og augo i Pt2. Dei oransje og dei blå stripene er strikka like breie, men det oransje har tova dobbelt så mykje som det blå. Det gjekk med 78 gram Tove og 5 gram Pt2. Eg brukte pinne# 7mm.

Så håpar eg Iris likar denne og at den får eit langt og godt liv i stova hennar. ;)

Julestjerner og ny hund/ Christmas ornaments and our new dog

Eg strikka desse kjappe og søte julestjernene fredag formiddag. Kjem nok til å strikke fleire av dei. Litt knotete å hente opp maskene for å strikke baksida, men då det var gjort gjekk det kjapt og greit.

Mønster

Garn: Drops Lima

Mengde: 30 gram

Pinnenr: 4mm

12. juni i år måtte me avlive vår gode og kjære hund, Siko. Etter det bestemte me oss i grunn for at me ville vente ei stund før me skulle ha ny hund. Siko var ein fantastisk snill hund, så me har vore veldig redd for å ende opp med å samanlikne ein evt ny hund med han. Før me fekk Siko forstod eg vel aldri heilt orda: "Hunden er menneskets beste ven!" Men då han var borte forstod eg vel for første gong kor tomt det var, og kor utruleg god venn ein hund er. Ein som alltid er glad for å sjå deg, alltid glad for å få vere med! I forrige veke begynte me å innsjå at det er ganske tomt her utan hund. Det og kunne kome heim, trøtt og sliten, men likevel er det ein der som er like glad for å sjå deg uansett! Alltid glad for å få vere med og få vere med på tur. På søndag var me og helste på Scott, ein 2 år gammal Border Collie hann, som er like snill og god som Siko, men i ein litt yngre og meir vilter utgåve. ;) Så god og herleg!! Han vart med oss heim og skal i første omgang vere her ei veke for å sjå at han trives med oss. Me trives i allefall veldig godt i lag med han, og det verkar som om han trives her og. ;) Han er med mannen min i fjøsen, i traktoren,- kort sagt heile tida. Medan Scott og eg går tur i lag og kosar oss i lag. Kjempekjekt å ha ein å gå på tur med kvar dag. Då me gjekk tur i dag, fekk han plutseleg auge på ein katt og fôr avgårde. Akkurat når det gjaldt katt var han ikkje heilt intressert i å høyre på meg heller, så eg trur me må trene litt på den. Men...då han kom springande i fullt firsprang tilbake nedover bakken snubla han i sine eigne bein og stupte kråke då han nådde flaten, opp igjen og sprang vidare i same tempoet. ;) Merkar at etter å kun ha hatt hund som har vore eldre enn 6-7 år, så er det ei artig overgang til ein ung hund på 2 år. ;) Så er det berre å sjå at Sotus og Scott vert gode venner, foreløpig har Sotus full panikk kvar gong han ser Scott, så me får prøve litt kvar dag.

Gryteunderlag/ Christmas hot pads

No har det vore dødt her ei stund, gitt... Det er mange ting som ligg ferdig, men eg har ikkje heilt somla meg til å ta bilete. Bl.a. har eg ein Allegheny kjole som vart ferdig 12.oktober som eg enno ikkje har tatt ein photoshoot av.

Gryteunderlaga var kjappe og greie å strikke. Litt vanskeleg å ta bilete i dag, men eg har no gjort eit forsøk. Måtte legge meg på golvet og sette litt opp ute på terassen i le for vinden, så nokre bilete vart det no. Nokre skal me ha sjølv, tenkjer eg, og nokre hamnar i gåvekassen.

Klikk på biletet så vert det større.

Mønster

Garn: Drops Eskimo,- tova i maskin

Pinnenr: 9mm

Mengde: 600 gram

_________________________________________

These Christmas hot pads were knitted a while ago. I will keep some of them and the rest will go in the giftbox. Pattern.

Strikk, strikk så vart det ein puff. ;)

For ei tid tilbake strikka Fjellbua ein slik puff og eg måtte berre ha ein slik eg og. Det tok ei tid før eg fekk strikka den og så tok det tid å få den inn i bloggen.

Denne vart strikka om kvelden 11.juli, men det har tatt litt tid å stappe og fylle. Inni er det to dundyner frå Jysk og eit grått stretchlaken rundt dynene før det er putta i puffen. Ein rask måte å strikke opp 1 kg garn på. ;)

Eg kikka litt på mønster både hos pickles og hos garnstudio, men endte opp med min eigen vri. La opp 40 masker med tre trådar Eskimo på pinnenr 15mm. Strikka riller til det var nesten tomt for garn,- felte av. Sydde saman kortendane. Snurpa saman eine langsida. La to dundyner inn i eit stretchlaken i omtrent same farge som garnet til puffen. Stripsa saman stretchlakenet. Putta det heile inn i puffen og snurpa saman den andre langsida. Festa tråden, forma og vips: Ein ny puff! :)

Det er faktisk opplett her i dag, så det er berre til å nyte det så lenge ein kan.

________________________________________________

This one was a fast knit. I kntited it in the evening of July 31st, but it took a while to find everything I needed to fill it with. 1 kilo of yarn! :)