søndag 15. juni 2014

Symre

Dette er mønster nr. 2 i Bitta sin klutealong på facebook.
Viss du ikkje er med enno bør du henge deg på. :)
Det er mange flotte mønster!
Eg er så heldig at eg får teststrikke, så denne var ferdig før alongen starta. Min Symre er strikka i Mandarin Petit, pinnenr 3mm og 23 gram.
Eg skal i grunn ikkje kjøpe garn, men bruke av det eg har, men eg synes i grunn at Mandarin Petit er for tynt til klutar. Eg har strikka nokre i dobbel tråd, men det passar ikkje til desse mønstra. Det einaste er at eg har høyrd rykter om at det er tomt for Tuva, som mange skryt av, på dei fleste Europris butikkane i landet. Det har verkeleg blitt ein klutefeber i landet. Nei, eg må nok skaffe meg litt tjukkare bomullsgarn, ein mellomting mellom Mandarin Petit og Drops Paris, tenkjer eg. :)
Ha ein strålande søndag! :)

torsdag 12. juni 2014

Bergknapp

Bitta Mikkelborg har ei kjempeflott facebookside, Bittamis Design for strikkelystne. Via denne gruppa har ho starta ein klutealong. Forrige fredag kom mønsteret på Bergknapp og i morgon kjem det eit nytt mønster. Det er berre til å gle seg for det er nydeleg!
Eg er så heldig og beæra at eg er ein av Bitta sine teststrikkarar, dermed får eg tilgang til mønstra medan dei enno er under produksjon og kan kose meg med alt det flotte Bitta designer.
Bergknapp vart ferdig fredag føremiddag og no gler eg meg til og kunne vise dykk det neste mønsteret som kjem i morgon! :)
Eg har strikka min Bergknapp i Mandarin Petit, pinnenr 3mm og brukte 23 gram.
Eg likar i grunn ikkje så korte klutar, så dei neste vert nok lenger.

Eg vaska kjapt over vaskebrettet før bilettaking, men burde så absolutt hatt litt tolmod og venta med bilettakinga til det var tørt. ;)

torsdag 5. juni 2014

Vakre ankelsokkar

 Ofelia er nok eit nydeleg sokkemønster som eg teststrikka for Bitta Mikkelborg i september.
Eg trudde eg hadde lagt dei ut då ho publiserte dei, men oppdaga no at det har eg ikkje. Så her kjem mine. Dei er strikka på pinnenr 2 og 2,5mm.
Eg har brukt Drops Fabel på desse og 46 gram.
Viss du klikkar på biletet vert det større og lettare å sjå detaljane i mønsteret.
Nydelege ankelsokkar!
Viss du ikkje er medlem av facebooksida hennar bør du ta ein kikk innom og bli medlem. Du finn den her. I morgon startar det ein klutealong på sida hennar. Bitta har mange flotte klutemønster og. 
Bitta kan verkeleg det med å designe mønster!

Valmue er eit nydeleg sokkemønster designa av Trude Hertaas.
Fleire av hennar mønster finn du her.
Desse er strikka på pinnenr 2 og 2,5mm og det gjekk med eit nøste Arwetta.
Desse var og strikka i september 2013 og eg var sikker på at eg hadde lagt ut bileta av desse før.

Ønskjer alle som er innom ei flott pinsehelg!

onsdag 4. juni 2014

Barselgåver

 Denne jakken er strikka i Freestyle og vart strikka i fjor. Den skulle vere ei gåve til ein gut som vart fødd i juli. Då eg omsider fekk somla meg til å feste trådar og gjere den klar, innsåg eg at den kom til å vere for liten. Eg endte då opp med å sende noko anna. :)
Denne vart heller ei gåve til ein liten gut som vart fødd i mai i år, og vart sendt avgarde like etter meldinga om fødsel tikka inn på mobilen. Så denne bør vel passe. :)
Sidan oppdateringa mi på Ravelry er særdeles dårleg om dagen, hugsar eg jo ikkje korkje pinnenr eller kva mønster eg har brukt. Eg veit at eg slo saman to ulike mønster, men eg hugsar ikkje kva.
Det gjekk uansett med 144gram Freestyle.

 Milo er strikka i 2014. :)
Foreløpig utan plan for kven som skal eige den.
Den er strikka på pinnenr 4mm.
Garnet er Drops Lima og det er brukt 100 gram.
Litt rukkete under bilettakinga, men, men...

Denne babykjolen er frå heftet Sandnes Lanett Baby 1214.
Den vart strikka til vesle Maria som vart fødd i april.
Ho fekk og den rosa/lilla Oslo Anorakken, som du kan sjå her.
Kjolen er strikka i Lanett på pinnenr 2 og 2,5mm.
Det er brukt 150 gram garn.

søndag 1. juni 2014

Prinseteppet


To innlegg i løpet av ei helg, det er jammen meg lenge sidan sist. :) Dette teppet var ferdig 30.desember og er ei gåve til ein liten gut som ventast til verda om om lag to veker. Det er strikka i Drops Lace, pinnenr 3,5 mm og det gjekk med 130 gram.
Klikk gjerne på biletet så vert det større.

Det er strålande ver om dagen og det har vore ei fantastisk flott helg. Store delar av familien til mannen min har vore heime, og det er alltid kjekt! Saman har me gjort alt frå å plukke stein i lag på eit attlegg til å grille, slappe av og kose oss i grillhytta som du skimtar nede til venstre i biletet.
Ønskjer alle ein fantastisk fin sommar og takk for at nettopp du tar deg tid til å kikke innom bloggen. Og har du lyst til å legge att ein liten kommentar er det veldig koseleg. Eg lovar å ta turen innom deg igjen, dersom du har blogg, men eg kan ikkje love at det vert med ein gong. :)

laurdag 31. mai 2014

Bittasokkar

I grunn litt flaut å legge ut desse bileta, for eg brukar aldri å ta så dårlege bilete av så flotte Bittasokkar! Bileta måtte takast fort og gale på kvelden før dei skulle giast vekk og dette var dessverre på vinteren med dårleg ver.
Paret til venstre er Bure og er strikka i dobbel fabel på pinnenr 3mm. Dei er strikka i str 42 og det gjekk med 182 gram. Meir nøyaktig info finn du her.
Paret til høgre er Styrbord og Babord. Dei er strikka i pt5 sport på pinnenr 3mm. Dei er strikka i str 46 og det gjekk med 150 gram. 
Styrbord og babord sokkane var ei Pay It Forward gåve til ein svoger og desse vart strikka før nyttår. Bure var ei bursdagsgåve til ein annan svoger og desse vart strikka i februar. 
Bitta designer så utruleg flotte mønster. Eg skulle ønskje det var mange fleire timar i døgeret så eg rakk å strikke alt det flotte ho komponerer.

laurdag 10. mai 2014

Oslo Anorakk # 3, 4, 5 og 6


Oslo Anorakkar er i grunn ganske kjedelege å strikke, og ja, eg kunne ha lagt litt mønster på dei, som t.d. Fana eller Marius, men det har liksom ikkje blitt. Det er kanskje stygt å seie at dei er kjedelege, men, men.. Tidlegare har eg strikka denne og denne til ei veninne som fekk tvillingar. På grunn av hennar tilbakemeldingar har eg valgt å strikke fleire. Ho skryt dei opp i skyene og har brukt dei frå dag 1 og brukar dei fortsatt. Dei er fast påkledning på ungane t.d. i vogn og det er det plagget ho har brukt mest. Så, då måtte eg jo berre høyre på ei mors erfaring og strikke til fleire vordende mødre.
To av desse er strikka i 2013, den grøne og den grå (begge til venstre). Den grøne sendte eg avgarde til ei studieveninne og ho var overlukkeleg då den kom i posten. Ho har ønska seg ein slik i lengre tid og hadde prøvd å få kjøpe ein, men ei anna kom ho i forkjøpet. Kjekt med slike tilbakemeldingar. Dei to andre er strikka i 2014 og 1,5 av dei vart strikka på Oslo treffet i mars. Den rosa og den grøne er strikka i Freestyle. Det rosa og det blå garnet er HUV garn, supplert med lagergarn.
Dei grå og blå: Det grå garnet er Nepal og det blå er ein tråd Lima og ein tråd Røros Lamullsgarn. Alle er strikka på pinnenr 6mm. Den grå/blå midt i biletet er enno ikkje sendt avgarde, men bør kome seg i posten i starten av neste veke. 

Vekt:
Grøn/blå: 220 gram
Grå/blå: 250 gram på kvar
Rosa/lilla: 215 gram

laurdag 3. mai 2014

Baby Converse # 7 og 8

Det går litt treigt mellom innlegga. Og eg held meg fortsatt til 2013, visst. Nærmar seg slutten håpar eg. 2014 har vore eit travelt år så det er vel kanskje like greit å ha noko frå 2013 å legge fram. :)
Dei blå vart hekla til eit gardbrukarkollegapar (er det i det heile tatt eit ord?) sin son. Han vart fødd i november. Dei lilla vart i utgangspunktet hekla til datra til søstra til ei god veninne av meg, men så var det dette med travel igjen då. Eg fekk jo aldri besøkt dei og helst på så når eg omsider fekk levert Mariusselekjolen, som du ser i innlegget under (den med hjarteknapp), så innsåg eg jo at conversa kom til å vere for små. Sidan ei god veninne av meg hadde Baby Shower for ei tid tilbake og fekk ei jente den 27.april, så vart dei levert til henne i stadenfor. Eg gløymde å ta bilete av dei lilla før eg leverte dei, så då er det godt å ha ei god veninne som kan knipse bilete og sende på e-post. :)

Begge er hekla i Drops Muskat og begge veg rundt 32 gram. 
Heklekrok 2, 3 og 4mm.
Eg vurderer å gå opp ein halv storleik på heklekrokane for å få dei litt større. Mulig eg gjer det om eg heklar endå fleire.
Link til mønster finn du i eit av dei andre innlegga om Baby Converse. Klikk på Baby under menyen. :)

Kanskje eg får ut eit innlegg til i løpet av dagen/kvelden? Det hadde jo vore fint, så eg får litt oversikten igjen. 
Ha ein strålande laurdag og ei flott helg!

søndag 6. april 2014

Mariusselekjolar


Eg strikka to søte Mariusselekjolar før jul til ei lita jente som vart fødd i september og ei som vart fødd i oktober. Jenta som vart fødd i september er datter til ei god studieveninne av meg som er produksjonsdyrveterinær og veldig glad i sauer. Det måtte jo då sjølvsagt bli saueknappar på hennar kjole. Jenta som vart fødd i oktober er søstra til barndomsveninna mi gjennom over 30 år, og er nesten som ei veslesyster for meg og. Hennar kjole vart med hjarteknappar på. Begge kjolane er strikka i Drops Lima, pinnenr 3 og 3,5mm og er strikka i storleik 1 år. Mønsteret er henta frå Marius strikkeboka. Kor mykje garn eg har brukt veit eg foreløpig ikkje då eg gløymde å vege dei før eg sendte dei i frå meg, så eg ventar på meldingar frå mødrene. :)
Begge er strikka i mørk lilla (ikkje alltid så lett å fotografere denne fargen), off white og gamalrosa.

I helga spelar eine nevøen min på 13 fotballcup.
Han held meg oppdatert på melding etter kvar kamp, så eg sit her og ser på telefonen jamnleg for å følge med! Dei er foreløpig komen til semifinalen og skal snart spele kamp igjen. Så utruleg kjekt! Stolt tante som sit nokre timar unna og heier. :)

I dag er det grått og disig og litt regn.
Søndagsmorgonane er mine i fjøsen, så mannen kan få sove lenge. Det er tungt å stå opp i sekstida på søndagen, men det er utruleg deilig når ein er kome seg i fjøsen.

Ha ein strålande søndag alle saman! :)
Og tusen takk til alle som kikkar innom og legg att ein kommentar.
Eg kjem straks på besøk tilbake. :)

laurdag 5. april 2014

Julegåver 2013


Ikkje mykje igjen no så håpar eg at eg kjem meg over i 2014. Eg trur eg har klart å samle resten av julegåvene her, pluss ei bestilling.
Øvst til venstre er Bella´s mittens strikka i dobbel Drops Alpaca. Desse var ei julegåve til ei niese i lag med FWSS hua øvst til høgre. Vottane er strikka ein fletterapport lenger etter tommelen, då dei elles vert litt korte. Det gjekk med 117 gram og dei er strikka på pinnenr 4,5mm.
FWSS hua til høgre er strikka med enkel tråd Drops Alpaca, pinnenr 3mm og her gjekk det med 52 gram. Det vart eit fint sett til ei flott niese på 16 som ønska seg vottar til jul.

Vesten vart til etter eg var på besøk hos ei veninne og datra hennar på 5 spurte meg: "Eg ser du har strikketøy i vesken din. E d te meg du strikkar?" Eg måtte jo sei som sant var, at det gjorde eg dessverre ikkje, men ho kunne jo fortelle meg kva ho ønska seg. Ønsket kom kjapt: "Eg ønskar meg en gensar, med stripar, hjertar og blomstar og så skal den være rosa og lilla". Vel, det vart ingen gensar, men det vart ein vest. Inspirert av Fanamønsteret. Her har eg brukt Duett og det gjekk med 224 gram. Og nok ein gong sidan eg ikkje har vore flink å oppdatere Ravelry og blogg jamnleg så hugsar eg jo sjølvsagt ikkje pinnestorleiken. Vesten er strikka i storleik 8 år.
Lynet McQueen vesten vart strikka til broren. Denne vart strikka i Lima og Lynet er brodert på i litt ulike typar fiber alt etter kva eg hadde. Her gjekk det med 141 gram, og nok ein gong anar eg ikkje kva pinnestorleik som har blitt brukt. Vesten er strikka i storleik 6 år.

Sløyfa som det er to bilete av er hekla i Muskat og det gjekk med 33 gram. Ei veninne fortalte meg rett før jul at sambuaren plutseleg hadde sagt at han ønska seg ei hekla sløyfe til jul. Ho kan ikkje hekle så ho sendte meg ei melding på Facebook, "har du tid? Kan du hekle ei sløyfe så kan eg overraske han med det på julaftan at eg faktisk har fått nokon til å gjere det?" Eg tok utgangspunkt i dette mønsteret og hekla den litt kortare. Håpar han har hatt den i bruk og er fornøyd. Sløyfa er i marineblått, som er litt vanskeleg å sjå på eit innebilete.

For fleire år sidan kjøpte eg mønster på pulsvarmarane Veyla og eg har lenge hatt utruleg lyst til å strikke dei, men det tok si tid før eg fekk gjort det. Desse er til ei god veninne til jul. Dei er strikka i Rauma Inca Alpakka, pinnenr 3mm og her gjekk det med 32 gram. 

fredag 4. april 2014

Fotballfans


Jada, så vart det eit lite opphold og eg jobber meg gjennom 2013 fortsatt. Tar si tid, gitt. Eg får no inderleg håpe at eg er komen meg inn i 2014 når påsken startar. ;)
Ein nevø ønska seg eit par Liverpool sokkar til jul. Eg tok utgangspunkt i dette vottemønsteret og strikka sokkar. Sokkane er strikka i Pt 5 Sport og det gjekk med 130gram til saman.
Dei er strikka med pinnenr 2,5 og 3mm. Eg skjønte fort etter eg var komen forbi hælen at dei kom til å bli for trange på leggen, men då hadde eg ikkje tid til å rekke opp att. Så dei ligg her no og venter på at eg skal strikke leggen på nytt med tjukkare pinnar.

Ei nisse ønska seg Brannhue til jul.
Her har eg laga mønster sjølv og hugsar jo sjølvsagt ikkje kva pinnar eg har brukt. Og det er her den kontinuerlege blogginga og ravelryoppdateringa kjem inn,- eg bør definitivt hente meg inn igjen på det. Den er uansett strikka i Smart og det gjekk med til saman 87 gram.

Forrige helg var eg på Strikketreff2014 i Oslo.
Eg hadde jo sjølvsagt ikkje med meg kamera, kunne sjølvsagt tatt bilete med mobilen, men kom no aldri så langt. Viss du er på Instagram kan du ta turen innom #strikketreff2014, så får du sjå kor kjekt me hadde det. 90 damer samla i lag til strikking, skravling, shopping, foredrag, workshop, soft is, popcorn, god mat osv. Krysser fingrar for at det vert nytt treff til neste år, ein eller annan plass i landet. Eg var første gongen i fjor og kjente jo då berre Fru Helianthus og mista fort litt oversikten over kven alle dei andre var. I år hugsa eg igjen ein del og kunne ta opp tråden litt frå i fjor i tillegg til å prate med nye.

laurdag 15. februar 2014

Adventskalendergåver


Jada, eg jobbar fortsatt med å få ut alt frå 2013.
Kvar gong eg ser gjennom albumet og prøver å samle i hop det eg kan legge ut i lag ser eg at "Oi, der var noko og, det hadde eg jo gløymd". Så det blir litt kollasje framover så eg får dei ut og kan starte på 2014. :)

Barndomsveninna mi, Jorunn, og eg har dei siste to åra laga adventskalendarar til kvarandre. Det er veldig koseleg. I 2013 laga eg store delar av gåvene til henne.
Adventslysa oppe til venstre er IKEA lys. Eg har kopiert tekst over på silkepapir og brukt varmluftspistol til å få det på lysa. 
Ho fekk ei lilla lyslykt og ei raud, men det er to bilete av kvar med og utan lys i.
Det gjekk med 20 gram mandarin petit til den raude og 20 gram Marks & Kattens Bianca (HUV garn) til den lilla lyslykta. Eg hekla ei heilt lik lilla lyslykt til meg sjølv og.
Dei raude glasbrikkene er hekla i Mandarin petit og kanten er London gull. Her bør eg eigentleg springe på loftet å hente fram nøsta for å finne ut nøyaktig kva eg brukte av kvar, men, ja, dei veg 42 gram til saman. :)
Dei kvite make-up remover padsa er hekla i Mandarin petit og det gjekk med 25 gram.
Tøflane og gryteunderlaga er strikka og hekla i Eskimo og tova i vaskemaskin. Det gjekk med 171 gram til tøflane og 81 gram til gryteunderlaga.

Ja, då nærmar eg meg, litt etter litt. :)

fredag 14. februar 2014

HUV strikk


Viss du ikkje veit kva HUV er, så kan du lese om det her.
I den same linken kan du og sjå kva garn eg fekk i mi HUV gåve.
Eg har strikka opp mesteparten av det eg fekk, men har ein del att som må leggast ut.
Det eg har lagt ut tidlegare kan du sjå her.
Klikk på biletet over så vert det større.
Som du ser av det flotte, grøne i bakgrunnen, så vart desse bileta tekne i august, vil eg tru.

Av det raude garnet (håndfarga garn), som eg no sjølvsagt ikkje hugsar kva er, vart det ein liten hekla blomst, ei hue og eit par pulsvarmarar. Og når eg i tillegg er så sløv at eg slutter å legge inn på ravelry eller skriv i notatboka mi når eg startar på ting, mønster, pinnenr, garn osv, så hugsar eg jo svært lite av det og.
Mønsteret til den raude hua er Bittas Nepalhat.
Blomst og pulsvarmarar hugsar eg ikkje, men det raude settet veg til saman 100 gram og alt det raude garnet er brukt opp.

Det gule garnet er Karisma Angora-Tweed frå Drops.
Mønsteret til den gule hua er Odessa.
I tillegg til hua vart det to blomstrar av det garnet.
Til saman er det brukt 50 gram og heile nøstet er brukt.

Det rosa garnet var og noko håndfarga garn og eg fekk tre nøster av det. 
250 gram gjekk med til eit sitteunderlag (har ikkje tatt bilete av det enno) og dei resterande 50 gramma gjekk til dei rosa pulsvarmarane du ser nede til høgre i biletet.
Mønsteret på desse er det same som eg har brukt her, her og her.
Desse er dog gjort litt enklare, med mindre blonder på (kun blonder mot fingrane) og så er det ikkje knappar på dei.

Ha ei strålande helg!
Her auser det ned med regn og bles i dag.

søndag 9. februar 2014

Mariustunika i tulliball


Då eg først fekk blogga gårsdagens innlegg, løsna bloggtørken og eg får forhåpentlegvis lagt ut alt som ligg her og venter litt etter litt. Sjølv om eg ikkje har blogga sidan september så ligg det no litt ferdige prosjekt her i tillegg til ting som er sendt avgårde, så eg må berre få samla alt litt etter litt så skal eg nok få ut resten frå 2013 før eg starter på 2014. :)

Denne tunikaen er eg kjempefornøgd med!
Klikk på biletet så vert det større.
Den er strikka i fantastiske tULLiBaLL.
Det lilla garnet, Ullent i fargen Pompøs, kjøpte eg på Oslotreffet i fjor.
Det gule, Ull & Tøys i fargen Ce(SO4)2 kjøpte eg på nett under ei oppdatering dei hadde.
Det grå, Ullent i fargen Hybelkanin, bytta eg med Margrethe (ravelry).

Heile tunikaen veg 304 gram.
Eg kjøpte 3 nøster med fargen Pompøs, og i følge ravelry skal dei vere på 100gram kvar, og då skal eg ha 26 gram igjen. men eg sit att med eit heilt nøste på 154gram + litt til...
Eg starta på den i juni på ein fagtur (busstur), og var vel ferdig med den i juli, men den låg til slutten av september før eg fekk somla meg til å feste trådar og hekle kantar rundt ermehola. :)
Bileta er og tekne før damping. 

tULLiBaLL er eit fantastisk godt garn å strikke med!
Meir info om tunikaen finn du her.

laurdag 8. februar 2014

Bitta sokkar og blogganbefaling



Det er jammen meg lenge sidan ei bloggoppdatering.
Eg bestemte meg for lenge sidan at eg skulle samle dei siste sokkane som eg teststrikka til boka i eit innlegg. Det har blitt utsatt og utsatt grunna så utruleg mykje som måtte oppdaterast på ravelry før eg fekk eg kunne legge dei inn. Fru Helianthus har purra på meg opp til fleire gongar,- "det er på tide med eit innlegg". No er det endeleg gjort. Eg innser at det ikkje kjem til å bli heilt som eg hadde tenkt og at eg linker til ravelry for fleire bilete og info i stadenfor. :)
Alle desse vart strikka i løpet av 2013.
Klikk på biletet så vert det større.

Dei to para med heilt raude sokkar er Ginas sokker, det eine er strikka i Ida Strømpegarn (80 gram), det andre i Pt5 (100gram). Det tredje paret med raude sokkar er 1913, strikka i fabel (80 gram). Det grøne paret er Yang´s, strikka i Arwetta (70 gram). 
Nedste rekke frå venstre: Yme, strikka i Sandnes Alpakka Strømpegarn (150 gram). Tøff(l)inger, strikka i Sisu og Silja (27 gram). Dei to siste para er Espen Askepott. Blått par strikka i Hifa garn (146 gram) og det siste paret strikka i Silja og Sisu (40 gram).

Viss du ikkje har kjøpt boka enno så bør du springe å kjøpe den over helga! :)
Bitta Mikkelborg - Sokker Strikking hele året.
Det er utruleg mange flotte sokkar i den boka for både nybegynnarar og for vidarekomne. Samstundes som det er ein unik mogelegheit til og kunne avansere, rett og slett fordi Bitta skriv utruleg flotte og detaljerte mønster som alle kan klare å følgje. Og dersom ein får problem undervegs og har spørsmål så har Bitta i tillegg ei flott facebook side der ein kan spør og dermed kan få hjelp undervegs.

Til slutt vil eg tipse om ei kjempeflott facebook-side og ein flott blogg!
Foreløpig er det mest bilete på facebook, men ta deg ein tur innom. Lik og del og løp og kjøp! :) Mange tøffe og fine toalettvesker, vesker, julesokkar osv. Det dukkar stadig opp nye ting der inne.
Anbefaler både facebookside og bloggen på det sterkaste!
Facebooksida kan du kome inn på sjølv om du ikkje har ei facebookside sjølv og. 

Puh! No er eg ferdig med det innlegget eg har utsett og utsett så no vert det forhåpentlegvis litt oftare innlegg på denne sida. ;)

Ha ei strålande helg!

måndag 16. september 2013

Johanne


I slutten av 2012 og starten av 2013 har eg vore så heldig å få vere ein av åtte teststrikkarar som har vore med på eit fantastisk eventyr forfatta og designa av Bitta Mikkelborg. Resultatet vert snart publisert mellom to permar, 52 par sokkar for liten og stor. Boka kan du bl.a. førehandsbestille her. Boka heiter "Sokker - strikking hele året". I denne boka er det sokkar for einkvar smak, for nybegynnarar og for dei meir erfarne, for godt voksne og for barn og premature. Bitta har tenkt på alle! I dag har me fått tillatelse frå den store sokkedronninga til å "terge" dykk litt etter litt på bloggar og på ravelry med dei flotte mønstra som kjem. Dette er det første eg legg ut, så skal eg prøve å legge ut eit kvar dag ei lita stund framover. Mønsteret på biletet over er Johanne. Det var mitt 22/52 par i 52ppvi. Mine sokkar er strikka i Sterk, pinnenr 2,5mm og det gjekk med til saman 91 gram.
Det er berre til å hive seg rundt og bestille boka, om du ikkje alt har gjort det, og glede seg til den kjem! :)

Eg har mange prosjekt som ligg ferdige, eller delvis ferdige (manglar trådfesting), men som manglar bilettaking. Så sjølv om bloggen ligg halvvegs død så kjem det litt, litt etter litt. ;)

tysdag 20. august 2013

Klutestrikk

Klikk på biletet så vert det større.
I sommar arrangerte Bitta ein klutestrikk along på facebook. Det kom eit nytt mønster i veka og til saman skulle det kome fem mønster. Det kom tidleg fram at dersom ei av deltakarane klarte å halde seg røykfri gjennom heile alongen skulle det kome eit sjette mønster. Etterkvart meinte fleire og fleire at det er jo sju dagar i veka så me ønska oss sju mønster. :) Bitta hadde ei søvnlaus natt, ikkje det at eg unnar ho søvnlause netter, men det dukka jammen meg opp eit mønster nummer sju og. Eg har ikkje strikka mønster nummer 6, The Grand Finale, men det kjem nok på pinnane det og etterkvart. På dei to bileta til venstre er alle klutane samla som eg har strikka i alongen. Dei to turkise klutane er strikka i Idena Cotton Lux. Kluten som ligg nedst er Juniper (einer) og den som er øvst er Rowan tree (Rogn). Dei to lilla klutane er Bird Cherry (hegg). På biletet under dei to lilla er det eit sett med eit handklede og to klutar. Dei er og strikka etter mønsteret Bird Cherry. Dei to melerte klutane er Goat Willow (selje). Den kvite kluten som ligg åleine er White Birch (bjørk) medan den beige er Strikkeglede (den fann eg ikkje link til på ravelry. Eg har i tillegg strikka ein klut til i Bird Cherry, men den gav eg vekk før eg fekk tatt bilete. Alle klutane, utanom dei lilla, er strikka av HUV-garn. Dei lilla er strikka i Drops Paris, dei kvite i Gjestal Heklegarn, den beige i Sandnes Mandarin Classic og dei melerte i Anchor Magic og Anchor Magicline. Eg lærte ein gong i tida at det beste garnet til klutestrikk er umercerisert garn, men gjennom denne alongen har eg skjønt at mercerisert har best kvalitet og sugeevne berre det vert vaska i maskin 2-3 gongar før bruk. Så det vert spanande å prøve. Meir info om klutane eg har strikka finn du her.


I vår strikka eg desse to klutane i gåve til ei veninne. Dei er strikka av dobbel tråd Mandarin Petit og det gjekk med om lag 70 gram garn til kvar.

Rowan Tapestry sett

Eg strikkar fortsatt på HUV-garn. Eg fekk bl.a. fire nøster med Rowan Tapestry, der tre av dei var i rosa fargar og eit i blåfargar. Vel, med litt innslag av andre fargar. Eit utruleg mjukt og godt garn å strikke med. Eg var litt usikker på kva eg skulle strikke av dette, men det endte opp med nokre babysett. Veldig greit å ha liggande som barselgåver til veninner. 

 Av det rosa garnet vart det to sett. Før eg starta på vottane utan snor prøvde eg å strikke eit par sokkar, men eg innsåg fort at eg ikkje fekk nok garn til det. Det var lite fristande å etterlyse garn her og (det kjem eit innlegg seinare om prosjektet eg fekk for lite HUV-garn til). Og for du som ikkje veit kva HUV-garn er, så kan du lese meir om det her. Det vart to huer (mønster finn du her), eit smetteskjerf, to vottar med tomlar og snor og eit par vottar utan tomlar og snor.

 Det blå nøstet vart ei hue og eit par vottar utan tomlar og snor.
Desse huene strikkar eg rundt. Eg legg opp ei maske mindre slik at det berre vert ei maske mellom aukingane bak og. No er det berre til å skyndte seg vidare med meir strikk. Foreløpig har eg 2 ulike HUV-prosjekt samstundes. ;) Meir info på ravelry her og her.

måndag 19. august 2013

Brudekjole til dukka

Då er eg ferdig med det verste HUV-garnet.
Det var putefyllet og sitteunderlaget i det forrige innlegget og så garnet som er brukt til denne dukka. Eg er heller ikkje så glad i sånn over melert garn, men det var no likevel litt lettare å finne på noko til det. Det skal eg legge ut bilete av i morgon. Garnet eg har brukt her heiter Solberg Garn Glans Mohair. Eit svært tørt og hardt garn å strikke med, men eg synes likevel det gjorde seg som brudekjole til dukka. Denne dukka er i utgangspunktet den eine søstra mi si. Ho er 10 år eldre enn meg og då eg var lita fekk eg kun lov til å leike med den når eg var på besøk hos henne på morgonane. Og eg fekk kun lov til å sitje i senga hennar med dukka. Vel, det ser ut som om eg har tatt mine frihetar litt meir etter at ho flytta ut då dukka har fått litt permanent make-up. 

Av dei to nøsta vart det ein brudekjole (detaljane i front ser du på biletet øvst til venstre), ein bolero, eit slep og eit lite teppe. Då var kvar ein einaste meter med garn brukt opp. Bak er det og ei sløyfe, men den kom ikkje så godt fram på biletet. Klikk gjerne på biletet så vert det større. Kanskje du ser den betre då? Det regnar ein del her på Vestlandet, som det jo har gjort mesteparten av sommaren, så det gjekk gjerne litt fort og gale med bileta. Mønsteret finn du her. Eg strikka sjølve kjolen to rapportar mindre på den nedste lace delen, men ser at eg kunne nok ha strikka dei og. Slepet er festa til kjolen med borrelås.

Meir info her (ravelry).

søndag 18. august 2013

Eg strikker i veg på HUV- garn

Mykje av garnet eg fekk i min HUV pakke har blitt strikka opp, eg må berre få tatt litt bilete først. Du kan lese om HUV her.
Det store, grønne nøstet du ser oppe til venstre var eg svært usikker på kva eg skulle bruke til, men så slo det meg at det hadde jo i grunn ei perfekt puteform. Eg måtte spør "sjefen" for HUV om eg fekk lov til å gjere det slik og då klarsignalet kom var det berre å finne eit mønster å sette i gong. Eg tok utgangspunkt i dette mønsteret, men endra det noko for å få det til å passe, og så laga eg det meir som ei  passande pute i sofaen vår. :) Banderolen på Big Ball Soft garnet er sjølvsagt ikkje inne i puta. :) I midten på det store nøstet putta eg det som var att av garnet eg strikka sjølve putetrekket med. Puta vart sydd i hop med maskesting og passar no fint på toppen av sofaen i sofakroken. Då fekk eg brukt opp 200 gram med Big Ball Soft og 100 gram med Gedifra Fashion Trend Color.
Meir info her (ravelry).

Fire nøster med Løve Garn Cocoon endte opp som eit litt hardt sitteunderlag. Då er det berre til å strikke vidare på HUV-garn. :) Eg har alt strikka opp ein del av bomullsgarnet. Solberg Glans Mohair og Rowan Denim er tomt og no er det nokre få gram att så er eg ferdig med Rowan Tapestry og. Det var berre dei bileta då....
Meir info her (ravelry).

søndag 11. august 2013

Baby converse


Det er altfor lenge sidan eit innlegg frå denne kanten, men det betyr ikkje at eg ikkje strikkar og heklar. ;) Mykje blir produsert, men det tar jammen meg tid å dokumentere og legge ut her på bloggen. I tillegg overtalte mannen min meg til at me starta å skrive ein gardsblogg, og det har tatt ein del tid. Det er travelt, så det vert mindre handarbeid enn det har vore, men eg har no likevel ein del å legge ut framover viss eg berre får somla meg til å ta bilete. :)

Både eine søstra mi og eg har vore Au Pair i USA, dog med 10 års mellomrom og på ulike kantar i landet. Eg har besøkt vertsfamilien hennar fleire gongar og har veldig god kontakt med vertsmora hennar. Ei flott dame i Annapolis. Ho spurde meg om eg ikkje kunne hekle eit par Baby Converse for henne. Dei vart hekla i slutten på mai/starte på juni og vart omsider sendt avgårde då eg hadde fått strikka ei lita gåve til dei og. Dei er hekla i Muskat som mange av dei andre eg har hekla tidlegare. Eg likar godt desse, så det vert nok fleire vil eg tru. Forhåpentlegvis vert det litt fleire innlegg innpå her etterkvart og.

Ønskjer alle ein fortsatt strålande søndag og ei god veke som kjem! :)

søndag 23. juni 2013

Blånissehue



 Mannen til ei av mine beste veninner gjennom 30 år sa til meg rett før jul at han ønska seg ei blånissehue. Då han sa det til meg andre gongen, svarte eg han at han fekk sei i frå til mor si så ho kunne strikke til han. Då fekk eg til svar: "Nei, eg ønsker meg det frå deg!"
Eg hadde planer om å strikke den til jul, men det rakk eg ikkje.
Forrige søndag var me inviterte til å feire 45 årsdagen hans, då dei er på ferie på sjølve dagen.
Då var det berre til å hive seg rundt og strikke blånissehue til han. :)
Dei reiser på båtferie snart og han har lova meg bilete av ein blånissekaptein. ;)

 Hua er strikka i Rauma Finull og pinnenr 7.
Det gjekk med 110 gram av kvar farge, så 220 gram til saman.
Den vart tove to gongar på 40 grader og ein gong på 60 grader.
No gler eg meg til å få bilete. :)

laurdag 22. juni 2013

Hemmeleg Uven

 Ja, du las riktig.
Eg meldte meg på Hemmeleg Uven (HUV) på Hobbyboden for litt sidan.
Det konseptet går ut på at ein sender frå seg garn som ein ikkje forstår kvifor ein har i hus, eller garn som ein ikkje har aning om kva i all verda ein skal produsere av og som i grunn berre tar opp plass og samlar støv. Eg sendte avgårde ei Norges Eske med mykje ekkelt effektgarn og pusegarn oppi og då pakkelappen til denne kom i posten i dag måtte eg inn å sjekke på posten på sporingsnr. Pakka vog 3,8kg!! UÆH!! Og nysgjerrig som eg var ilte eg på butikken og henta pakka og måtte jo sjølvagt opne den i bilen. Det første som møtte meg var den grøne, store, hårete ballen av eit pusegarn. Og eg tenkte i grunn at dette er ein fæl pakke, men eg må vel seie at til trass for at eg har fått 3,8 kg med garn så har eg i grunn vore ganske så heldig.

 Desse to hespa med Glans Mohair frå Solberg og det grøne, Big Ball nøstet frå Schoeller stahl er vel dei eg kjem til å slite mest med. Ikkje har me nieser som leikar så mykje med dukker lenger heller, men kanskje det kan bli dukkeklede til ein basar eller noko? Eit dukketeppe, ei dukkekåpe... Hm...må tenke litt.

 Melert garn som dette er langt i frå min favoritt, men eg ser at noko av dette kan bli dukkeklede eller huer. Øvst til venstre er det to nøster frå Gedifra Det er 49% acryl og resten ull. Ved sida av ligg det to nøster med Multi Kido LøveGarn. Det minner litt om Kid Silk og kan kanskje verte ein tråd i eit sjal el.l. Til høgre ligg det fire nøster med Cocoon frå LøveGarn. Litt skeptisk til kva eg skal bruke det til. Nedst er det fire nøster med Rowan Tapestry. Trur nok det kan bli nokre fine huer, sjal, eller dukkeklede. Må tenke litt på dei å sjekke litt på ravelry. Eg likte u grunn Multi Kido og Rowan Tapestry her og gler meg til å prøve dei ut.

 Biletet over her viser Rowan Denim.
Frå banderolen: "Denim shrinks in length & fades just like jeans".
Dette garnet har eg aldri vore borti før så ravelry må nok sjekkast ut.
Synes dette ser spennande ut og blir artig å prøve ut. I grunn kjekt at det er litt fleire nøster og så kan ein jo produsere noko litt større.

 Dalegarn Freestyle.
Dette skal eg garantert klare å få noko ut av! :)

 Ein del ulike bomullsgarn.
Eg har ikkje vore nokon racer på kunststrikka dukar eller hekla dukar, men kanskje eg må prøve det. Ein del av dette garnet er svært tynt! Alt det farga som ligg i front er mercerisert, men ettersom eg har skjønt på Bittami si side på facebook (der går det føre seg ein klutestrikk along for tida) så er det mange som strikkar klutar i mercerisert garn, vaskar dei 2-3 gongar i vaskemaskina og så er visst sugeevna og haldbarheita super. Så kanskje eg må prøve det. Den rosa til høgre er Brilla og er blanding av Bomull og viskose.
Det tynne garnet kjem eg til å slite ein del med, men alt det andre blir nok ikkje noko problem i det heile.

Her er det litt ukjende garntypar.
Den gule er Karisma Angora-Tweed frå Drops.
Eg var overbevist om at det var Felisi som er min HUV, men jammen meg tok eg ikkje feil og må leite vidare. :) Eg synes i grunn denne pakken var ganske snill, sett bortifrå mengda, tynt bomullsgarn og det vesle pusegarnet som var. Eg skal i allefall ikkje klage! :) Lageret mitt er i allefall minka med ubrukeleg garn. :)

tysdag 18. juni 2013

Vinkartongtrekk

 Ei veninne spurde for ei tid tilbake om eg kunne strikke eit vinkartongtrekk for henne som dei kan ha i båten når dei skal på ferie. Ho kjøpte inn garn og garnet vart no liggande her ei stund før eg kom i gong. No er det ei stund sidan det var ferdig, 21.mai, men på søndag vart det levert.

 Mønsteret er henta frå Marius strikkeboka.
Det gjekk med 83 gram med garn totalt.
Pinnenr 5 mm og Sandnes Garn Smart.

Så får eg håpe at trekket pynter opp i båten,
og at dei får ein flott ferie langs norskekysten. :)

søndag 16. juni 2013

32/52 Little Miss Summer

Par nr 32 og det vert nok eit av dei siste i denne plungen.
Eg kjem meg ikkje nærmare dei 52 para.
Eg kunne jo ha satt i gong med stress strikking og strikka
19 par (eg har par 33 på pinnane) med babysokkar for å klare 52,
men det er ikkje noko mål i seg sjølv.
Og stress strikking har eg gjort nok av opp gjennom
og har ingen behov for å gjere det her. :)
Jaja, eg satsar no friskt og har meldt meg på den nye 52ppvii
som startar 1.juli. 52 nye par sokkar. :) Hoho...
Paret over her vart strikka i mai til ei niese sin bursdag.
Ho fekk desse, Sockdolager (par 26) og par 31 som foreløpig
er eit hemmeleg mønster som eg ikkje kan vise fram.
Dermed fekk ho eit tjukt par, eit tynt og eit par ankelsokkar. 

Nærbilete av eine sokken.
Det kjem vel ikkje som ei bombe at dette er eit mønster
designa av Bitta Mikkelborg.

Garn: Drops Fabel
Pinnenr: 2 og 2,5mm
Mengde: 35 gram

laurdag 15. juni 2013

30/52 Milla

Desse vart ferdige den 9.mai så det er ei stund sidan.
Det tar tid å få lagt ut bilete. :)
Dette var februar sokkane i sokkealongen på uformelt.
Eg ligg med andre ord langt etter i alongen,
og eg ligg langt etter i 52ppvi, men, men sånn er det.
Wims lagar utruleg flotte mønster så eg skal definitivt strikke resten
av mønstra hennar og.
Eg speglvende mønsteret, men eg tenkte ikkje på å speglvende flettene, jaja...

Pinnenr: 2 og 2,5mm
Garn: Arwetta classic
Mengde: 66gram

onsdag 22. mai 2013

29/52 Hestesokkar


 Ei flott dame fylte 50 år i april og i den anledning strikka eg desse hestesokkane og dei svarte pulsvarmarane i innlegget under til henne. Det er ho me kjøpte hunden vår, Scott, av. Ho har og sauer og hestar. Me var litt usikre på om eg skulle strikke sauesokkar eller hestesokkar til henne, men endte opp på hest. Eg fann eit mønster på ravelry som eg tok utgangspunktet i. Eg strikka sokkane slik eg sjølv brukar å strikke dei og brukte det eine diagrammet frå mønsteret på ravelry. Mønsteret utover foten droppa eg då eg personleg ikkje synes det var så veldig fint.
Garn: Arwetta Classic
Pinnenr: 2,5mm
Mengde: 75 gram

tysdag 21. mai 2013

Pulsvarmarar


To par pulsvarmarar strikka i gåve. Det grøne paret vart strikka til ei veninne som er midt oppi eksamen no. Ho studerer spansk og hadde eksamen på torsdag og i dag. Sendte ho då eit par pulsvarmarar og litt snop som ei lita oppmuntringsgåve. Det svarte paret er strikka til ei anna flott dame som ein del av ei bursdagsgåve. Resten av bursdagsgåva vil eg tru eg får lagt ut i morgon eller på torsdag. :)
12.-14.april var eg på Strikketreff i Oslo og tilbrang ei heil helg i lag med 100 strikkegale (-glade) damer frå heile Noregs land. Det var garn og pinnar, god mat, konkurransar, soft is og popcorn. Første dagen fekk me ein "goodiebag" og oppi den var det bl.a. ei garnpakke frå Hifa med eit nøste Pelsullgarn (50 gram) og eit mønster på dei pulsvarmarane du ser over.
Ei heilt fantastisk artig og koseleg helg! Eg håpar eg får med meg neste års treff og.
Grønnfargen er mest riktig på biletet til venstre.

Garn: Grønne: Fotrama Alpaca, Svarte: Hifa Pelsullgarn
Pinnenr: 3,5 mm
Mengde: Grønne: 27 gram, Svarte: 24 gram

måndag 20. mai 2013

28/52 Havsokken #2


Desse er og strikka på bestilling til ei veninne. 
Det første paret kan du sjå her.
Dersom du er nybegynnar i sokkestrikk ville eg ikkje ha starta med desse då mønsterforklaringa er litt dårleg i overgangen mellom hæl og fot. Når ein gjerne har strikka litt andre sokkemønster med gode forklaringar kan det vere greit å strikke desse.
Sokkane er på veg nordover til Andøya.
Meir informasjon på ravelrysida mi.

Garn: Fjell Sokkegarn 3 og Embla - Hifa 3
Pinnenr: 4,5mm
Mengde: 178 gram

torsdag 16. mai 2013

Torunn gjer ting ho ikkje kan...

 Denne hua vart strikka for om lag ein månad sidan og skal ein tur nordover til Kirkenes
til min eldste nevø. Eg strikka tidlegare ei A&C hue i oransje og lilla og tenkte med ein gong eg hadde strikka den at den var jo perfekt i fargane til minstemann der nord. Då måtte jo eldstemann få velge seg ut ei hue og, og valget fall på denne. Fargane har han tatt ut sjølv og etter ein liten dukkert i tanta sitt garnlager. Veldig kjapp å strikke.

Pinnenr: 4,5 og 5mm
Garn: Dale Freestyle
Mengde: 130 gram

 I helga som var vart me invitert i ein 40 årsdag til ein kamerat, og eg tilbydde meg å bake ei kake.
Kona til jubilanten valgte gulrotkake. Eg har ofte sett på alle desse flotte kakene som vert laga rundtom og alltid hatt lyst til å prøve meg på å pynte sjølv. Denne gongen fann eg ut at "kvifor ikkje?" Viss det ser heilt på jordet ut kan eg jo berre smøre det utover som ein vanleg glasur.
Sprøytetuppen eg hadde var altfor tynn, så "rosene" vart litt små og ynkelege. Dersom eg skal gjere dette att skal eg nok kjøpe meg ein litt tjukkare ein. 
 Eg fann litt wilton farge og rosa måtte jo bli blå til ein bonde.
Eg blanda fargen inn i marsipanen og tenkte ikkje akkurat på at eg burde hatt hanskar,
så hendene såg jo ut deretter. Jaja, godt eg skulle ut å mjølke kyr etterpå. Då vart i allefall henda reine.:)
Eg var ein smule stressa då eg laga denne rosa, for eg skulle ha vore i fjøsen for lenge si, og me hadde dårleg tid skulle me rekke inn dit. Eg stressa i veg, marsipanen klistra seg på kjevlet, marsipanen glei frå kvarandre og det var umogeleg å få det fint til. Til slutt brukte eg kun ein rund utstansar og flata desse rundingane litt ut og så bretta eg i veg, eit blad utanpå dei andre osv. Til slutt vart det ei nokonlunde rose.
Vel, det får vere bra for første gongen å vere.
Hadde dette vore for 2-3 år sidan så hadde eg aldri levert denne kaka frå meg.
Perfeksjonist og panikk for kva alle andre meiner.
No konkluderte eg med at "sånn vart det" og tok den med meg, og er veldig fornøyd med meg sjølv for at eg klarte nettopp det. Den ser vel i grunn ut som eit takras, men med ein tjukkare sprøytetupp, litt betre tid og litt meir trening så vert den vel kanskje betre neste gong.
Dette var jo første gongen og samtidig under stressa forhold. :)

LinkWithin

Related Posts with Thumbnails